Gazetari Xhevahir Zhabina ka zbardhur detaje tronditëse nga ngjarja e rëndë në Gjykatën e Apelit, ku mbeti i vrarë gjyqtari Astrit Kalaja dhe u plagosën dy persona të tjerë.
“Zbrazi pistoletën ndaj gjyqtarit, pastaj ia dorëzoi policit!” – Zbardhen momentet e tmerrit në sallën e Apelit
Sipas tij, autori i krimit, Elvis Shkambi, ka zbrazur pistoletën në drejtim të gjyqtarit dhe palës kundërshtare, menjëherë pasi ka dëgjuar vendimin që nuk ishte në favor të familjes së tij. Pas ngjarjes, ai ka dorëzuar armën tek polici i gjykatës dhe ka pritur mbërritjen e forcave të rendit.
Sipas Zhabinës, konflikti kishte nisur për pronësinë e një godine trekatëshe në Shkodër, ku prej vitit 1993 jetojnë rreth 30 familje. Të dyja palët, si banorët ashtu edhe familja Shkambi, pretendonin pronësinë mbi godinën, duke sjellë një betejë të gjatë ligjore.
Në shkallën e parë, familja Shkambi kishte fituar, por vendimi u kundërshtua në Apel, ku gjyqtari Astrit Kalaja vendosi në favor të banorëve. Pikërisht në atë moment, 30-vjeçari Elvis Shkambi ka nxjerrë armën dhe ka qëlluar në drejtim të gjyqtarit dhe palës kundërshtare.
Pasi ka mbaruar fishekët, ai ka dorëzuar armën dhe është vetëdorëzuar.