Pak javë më parë, një video e regjistruar në tregun e fruta-perimeve në Sarandë bëri xhiron e rrjeteve sociale dhe portaleve shqiptare. Në kuadër të një kontrolli për zbatimin e urdhrit të kryeministrit Edi Rama për luftën kundër evazionit fiskal, inspektorët e tatimeve shkuan për të monitoruar shitjet pa faturë. Aty, në qendër të vëmendjes papritur u gjend Fatbardha Nesturi, shitësja e njohur në treg, e cila u përball publikisht me kontrollin dhe inspektorin lokal, Muçin.
U bë e famshme pas “sherrit” me Muçin! Bardhës nga Saranda i ndryshon jeta krejt papritur
Videoja u bë virale, dhe ndërsa për Muçin u mbyll me kaq, për Bardhën ishte vetëm fillimi i një kapitulli të ri.
35 vite në treg: “Kjo është punë për Bardhën”
Në një intervistë të dhënë për A2 CNN, Bardha rrëfen jetën e saj mes arkave me perime dhe aromës së freskët të frutave vendase:
“Unë kam 35 vjet këtu. Kjo është punë vetëm për Bardhën. Dita ime nis në 4 të mëngjesit. Marr mallin nga fshatarët që e sjellin nga zonat përreth, e sistemoj dhe e përgatit për ta shitur. Kështu e kam mbajtur familjen.”
E njohur prej kohësh nga bashkëqytetarët e saj, Bardha ishte një figurë e zakonshme e përditshmërisë në tregun e Sarandës – deri në momentin kur një video e thjeshtë e transformoi në një emër të njohur në gjithë Shqipërinë.
Nga frika për të humbur punën, në “yjet” e rrjeteve sociale
Fillimisht e frikësuar për fatin e punës së saj, ajo kujton momentet e tensionit gjatë kontrolleve:
“Nuk dija ç’të thosha… jam mësuar me këtë punë, më dukej sikur po më merrnin jetën. Por tani më njohin të gjithë. Jam bërë e famshme me vulë!”