Kryetari i Partisë Demokratike, Sali Berisha, ka reaguar ashpër pas ekzekutimit të gjyqtarit të Gjykatës së Apelit, Astrit Kalaja, ngjarje që ka tronditur opinionin publik.
“Sali Berisha reagon pas vr*sjes së gjyqtarit Kalaja: Kr*mi po sundon rendin”
Në një postim në Facebook, Berisha shprehu ngushëllimet për familjarët dhe dënoi me forcë aktin kriminal që ndodhi brenda ambienteve të gjykatës.
“Duke i shprehur ngushëllimet më të ndjera familjes, miqve dhe të afërmve të gjyqtarit të ndjerë Kalaja, dënoj me forcën më të madhe aktin e shëmtuar dhe kriminal ndaj gjyqtarit brenda institucionit. Kjo ngjarje është dëshmi e kontrollit të rendit nga krimi dhe pasigurisë së madhe që ekziston sot në vend. Kërkoj dënimin më të rreptë ligjor për ekzekutorin dhe porositësit e këtij krimi shumë të rëndë”, shkroi Berisha.
Ngjarja ndodhi brenda godinës së Gjykatës së Apelit, ku gjyqtari Astrit Kalaja u vra me armë zjarri. Sipas raportimeve të A2 CNN, autori i dyshuar është arrestuar dhe identifikuar si Gjon Shkëmbi.
Përveç gjyqtarit, janë plagosur edhe dy persona të tjerë, babë e birë, të cilët u dërguan për trajtim mjekësor në Spitalin e Traumës.