us.shqiperia-sot.com

“Rama mbledh urgjentisht Kryesinë e PS! Porosi për Manastirliun pas shkarkimit të Veliajt”

Written by

Editorial

in

Rama mbledh urgjentisht Kryesinë e PS-së pas shkarkimit të Veliajt – Manastirliu në qendër të vëmendjes

Kryesia e Partisë Socialiste, një nga organet më të larta vendimmarrëse të kësaj force politike, do të mblidhet pasditen e kësaj të marte në selinë qendrore të PS-së.

Burime brenda partisë bëjnë me dije se kryeministri Edi Rama u ka kërkuar të gjithë anëtarëve të Kryesisë të jenë të pranishëm në takim, i cili do të nisë në orën 18:00.

Mbledhja pritet të ketë karakter organizativ, ndërsa drejtuesit e strukturave socialiste do të marrin udhëzime të qarta për daljen në terren dhe mobilizimin në mbështetje të Ogerta Manastirliut, që tashmë shihet si kandidatja e preferuar për Bashkinë e Tiranës.

Pas shkarkimit të Erion Veliajt nga Këshilli Bashkiak dhe më pas nga Këshilli i Ministrave, gara për drejtuesin e ri të kryeqytetit është zyrtarisht e hapur.

Presidenti Bajram Begaj ka firmosur tashmë dekretin presidencial, duke i hapur rrugë procesit të ri zgjedhor.

Emri i Ogerta Manastirliut u propozua publikisht nga Edi Rama në Asamblenë Kombëtare të PS-së, disa ditë më parë.

Në fjalën e tij, Rama deklaroi se “Tirana nuk ka kohë për të humbur” dhe se “duhet vazhdimësi në drejtim, ndërsa Veliaj sqaron çështjet me drejtësinë”.

Në selinë rozë, pritet që mbledhja e sotme të jetë sinjali zyrtar për nisjen e fushatës intensive për Tiranën, me Manastirliun në qendër të vëmendjes dhe me Ramën që kërkon unitet të plotë në radhët e PS-së.

More posts