Juristi i njohur Ylli Manjani ka ngritur alarmin për disa nene të draftit të Kodit të ri Penal, duke i cilësuar ato si të rrezikshme për qytetarët. Në një intervistë për “Now” në Euronews Albania, ai tha se dispozitat për “pasurimin e paligjshëm të kujtdo” janë një mënyrë për t’u grabitur pronën shqiptarëve.
Pasuria e çdo qytetari në rrezik? Ylli Manjani paralajmëron për nenet e reja në Kodin Penal
“Imagjinoni, të ndalon polici në rrugë dhe të pyet: këtë xhaketën ku e ke blerë? Nëse nuk e bind, mund të të konsiderojnë të pasuruar në mënyrë të paligjshme. Kjo është e tmerrshme. Kodi Penal nuk mund të shndërrohet në një armë për të rrëmbyer pasuritë e qytetarëve”, – tha Manjani.
Ai e quajti këtë logjikë “bolshevike” dhe “majmunizëm”, duke theksuar se aktualisht një verifikim i tillë bëhet vetëm për personat që kanë indicie kriminale në kuadër të ligjit antimafia. Ndërsa, sipas draftit, rreziku do të përfshinte çdo qytetar.
Manjani ngriti shqetësimin se Kodi i ri fokusohet vetëm te dënimi me burg dhe jo te edukimi i shoqërisë:
“Qëllimi nuk është të fusim gjithë shoqërinë në burg, por ta edukohet. Ka shumë shkelje që duhen trajtuar administrativisht, jo penalisht. Nuk zgjidhet asgjë me pranga.”