Blog

Në Shqipëri, të punosh si kamarier është kthyer jo vetëm në një profesion sfidues, por në disa raste fatkeqësisht edhe në një rrugë pa kthim. Rasti më i fundit, ai i dhunës së ushtruar ndaj një kamarieri Ron Balaj nga një ish-polic në Vlorë, ka rikthyer vëmendjen tek një bilanc tragjik që pak është thënë në publik: të paktën 7 kamarierë janë vrarë në 11 vitet e fundit teksa ushtronin punën e tyre.

Gazetari Klevin Muka, në një status të fortë në rrjete sociale, ka sjellë në vëmendje këto histori të rënda, duke i përmendur me emra dhe data, dhe duke ngritur një pikëpyetje të madhe morale për shoqërinë dhe institucionet: Si mundet që punëtorët më të ndershëm, më të thjeshtë dhe më të pambrojtur të përfundojnë në mënyrë kaq tragjike?

Bilanci i zi:

• 14 Gusht 2014 – Denis Vyshka, 28 vjeç, kamarier në Dhërmi, vritet nga dy pronarët e lokalit ku punonte. Dyshonin se u kishte vjedhur para. I riu u torturua për 3 orë dhe një goditje me hanxhar i mori jetën.
• 29 Shtator 2015 – Gentian Bajraktari, 21 vjeç, kamarier në Elbasan, qëllohet për vdekje nga një klient, vetëm sepse vonoi picën.
• 27 Qershor 2021 – Musaen Zeneli, 20 vjeç, kamarier në Velipojë, mbetet i vrarë pas një përplasjeje mes dy grupeve që luftonin për shezlongët në bregdet. Ai ndodhej aty për të punuar.
• 4 Tetor 2021 – Gazment Kurmaku, kryekamarier në Fish City, Elbasan, dhunohet për vdekje pasi nuk lejoi një klient problematik të ulej në një tavolinë të rezervuar.
• 12 Mars 2023 – Mimoza Paja, kamariere në Laprakë, qëllohet për vdekje gjatë një atentati në mes të kryeqytetit. Ajo kishte me vete edhe mbesën e saj, ndërsa punonte për të mbajtur familjen.
• 5 Qershor 2024 – Eraldo Nevruzi, recepsionist në një hotel në Dhërmi, vritet nga pronari i hotelit vetëm një javë pasi kishte filluar punën.

• 20 Korrik 2024 – Gledjan Muka, 36 vjeç, kamarier në Memaliaj, humb jetën gjatë një masakre. Ai nuk ishte shënjestra, por viktimë rastësore teksa punonte për bukën e gojës.

Një shoqëri që nuk mbron të pambrojturit

Këto histori nuk janë thjesht kronikë e zezë. Janë pasqyrë e një realiteti ku dhuna, papërgjegjshmëria institucionale dhe mungesa e kulturës së respektit ndaj punëtorëve, kanë sjellë pasoja fatale. Asnjë prej këtyre të rinjve nuk kërkonte asgjë më shumë sesa një pagë për të jetuar me dinjitet. Dhe për këtë sakrificë, u shpërblyen me vdekje.

Rastet janë në rritje, ndërsa askush nuk flet më për të mbijetuarit: prindërit që s’e kanë marrë dot veten, fëmijët që mbetën jetimë, familjet që mbetën pa dritën e syve.

Apeli

Është koha që të merren masa reale. Të vendosen standarde sigurie për punonjësit e bareve dhe restoranteve, të ushtrohet kontroll mbi mënyrën se si trajtohen nga pronarët apo klientët dhe të ketë ndëshkime shembullore për çdo akt dhune në vendin e punës.

Sepse nuk mund të quhet “punë” kur përfundon në varr. Sepse nuk ka gjynah më të madh se të vdesësh duke kërkuar bukën e gojës.

U prehshin në paqe. Të mos harrohen kurrë.

Këtë të martë janë hapur aplikimet për përzgjedhjen e programeve të studimit në universitete.

Lajmin e ka bërë me dije edhe kryeministri Edi Rama, i cili shkruan se sistemi do të jetë i hapur deri më 3 gusht, për t’iu dhënë mundësi të gjithë maturantëve për përzgjedhjen deri në 10 programe studimi në universitetet shqiptare.

“Hapen sot aplikimet për përzgjedhjen e programeve të studimit në universitete

Sistemi do të jetë i hapur deri më 3 gusht, për t’iu dhënë mundësi të gjithë maturantëve për përzgjedhjen deri në 10 programe studimi në universitetet shqiptare
Apliko tani në https://ualbania.al/”-shkruan Rama.

Avokati Kujtim Cakrani, mbrojtës ligjor i policit të pezulluar Ardian Isufi, ka reaguar me tone të forta në lidhje me ngjarjen që tronditi opinionin publik në Vlorë, ku një 18-vjeçar u dhunua nga një efektiv policie jashtë shërbimit. Në një intervistë për emisionin “Now” në Euronews Albania, Cakrani mohoi kategorikisht që klienti i tij të ketë qenë personi që e goditi kamarierin.

Sipas tij, pamjet e publikuara në media janë të manipuluara me qëllim për të “sakrifikuar” efektivin Isufi. “Videoja është prerë. Nuk jepet e plotë, nuk tregohet dinamika. Kjo është bërë për të sulmuar policin dhe për të justifikuar dhunën e ushtruar ndaj tij nga një grup personash jashtë lokalit,” u shpreh Cakrani.

Ai shtoi se Ardian Isufi është në gjendje të rëndë shëndetësore dhe ndodhet në reanimacion, ndërkohë që asnjë zyrtar i lartë i Policisë së Shtetit nuk ka shkuar ta vizitojë apo të interesohet për të. “Kjo është e turpshme! Ai ka mbi 20 vite në shërbim dhe është braktisur,” tha avokati.

Cakrani nuk i kurseu akuzat edhe ndaj kryeministrit Edi Rama, duke e quajtur atë “palaço” dhe duke e akuzuar për ndërhyrje të panevojshme në një proces ende në hetim. “Palaço kryeministri që i hedh benzinë zjarrit! Në vend që të presë hetimet, del e jep urdhra për përjashtime dhe ndëshkime pa u provuar asgjë,” tha ai.

Avokati publikoi gjithashtu një tjetër video ku pretendon se klienti i tij është rrahur nga rreth 15 persona jashtë lokalit. Sipas tij, kjo pjesë e incidentit po fshihet nga media dhe autoritetet, ndërkohë që për dhunën ndaj kamarierit ai deklaroi: “Isufi i futi vetëm dy shpulla – as më shumë, as më pak!”

Ngjarja vijon të jetë në fokusin e publikut dhe institucioneve, ndërsa hetimet janë ende në zhvillim. Në anën tjetër, gjithnjë e më shumë zëra kërkojnë transparencë dhe drejtësi të plotë për të dyja palët.

Një rast i ndjeshëm është duke u hetuar nga autoritetet në Fier, ku tre persona, përfshirë një të rritur dhe dy të mitur, dyshohet se kanë pasur kontakte intime me një vajzë 13-vjeçare.

Policia lokale ka bërë me dije se një 30-vjeçar me inicialet F. S. është shpallur në kërkim, ndërsa ndaj dy të miturve 15-vjeçarë është nisur procedimi penal në gjendje të lirë. Sipas burimeve zyrtare, hetimet po zhvillohen me kujdes të shtuar për të përcaktuar saktësisht dinamikën dhe rrethanat e këtij rasti.

Specialistët për Hetimin e Krimeve të Komisariatit të Policisë Fier shpallën në kërkim shtetasin F. S., 30 vjeç, si dhe referuan materialet në Prokurori për dy 15-vjeçarë, për dyshime mbi marrëdhënie intime me një të mitur 13 vjeçe. Punohet për kapjen e 30-vjeçarit”, thuhet në njoftimin zyrtar.

Ngjarja është trajtuar me përparësi nga strukturat përkatëse, ndërkohë që janë përfshirë edhe shërbimet sociale për të garantuar mbrojtjen dhe mbështetjen e vajzës së mitur. Organet e drejtësisë pritet të sqarojnë më tej situatën në ditët në vijim.

---

Dy vjet e gjysmë, 40 seanca të shtyra dhe asnjë përballje reale me drejtësinë për një nga tragjeditë më të mëdha të Shqipërisë demokratike. A do të mbërrijë ndonjëherë drejtësia në Gërdec?
Procesi gjyqësor ndaj ish-ministrit të Mbrojtjes, Fatmir Mediu, për përfshirje direkte në tragjedinë e Gërdecit, ka shënuar një rekord zvarritjeje absurde në historinë e gjyqësorit shqiptar: mbi 40 seanca të shtyra dhe ende pa hyrë në thelb.

Çështja “Gërdeci” nisi zyrtarisht më 27 korrik 2021, kur SPAK kërkoi rihapjen e hetimit ndaj Mediut. Gjykata e Shkallës së Parë e refuzoi. U desh ndërhyrja e Apelit të Posaçëm dhe e Gjykatës së Lartë për të urdhëruar marrjen e tij të pandehur dhe vazhdimin e procesit penal.
Por që prej atëherë, procesi është kthyer në një maratonë të qëllimshme pengesash: mungesa sistematike të avokatëve, mosparaqitje të dëshmitarëve e ekspertëve, dhe më së shpeshti, udhëtime të rregullta të të pandehurit në Shtetet e Bashkuara, njëri pas tjetrit, gjithnjë rastësisht pak ditë para seancave.
Asnjë ndalim daljeje nga vendi, asnjë paraqitje me forcë, asnjë masë përballë këtij sabotimi sistematik të procesit gjyqësor.

Pas çdo shtyrjeje, zbehet një provë, devijohet një dëshmi, harrohet një fakt. Ky është qëllimi i padiskutueshëm i avokatëve të Fatmir Mediut dhe mbrojtësve të tij të heshtur në sistem: të shtyhet pafund drejtësia derisa ajo të bëhet e pavlefshme.
E vërteta është që ndihmësit e tij më të mëdhenj janë jashtë sallës së gjyqit: Sali Berisha, që e mban të afërt për hesap politik, dhe Edi Rama, që tentoi ta amnistonte me ligj të veçantë përmes një draft-amnistie që dështoi nën presionin e partnerëve ndërkombëtarë.

Po flasim për një tragjedi me 26 viktima, mbi 300 të plagosur, dhe mbi 5 miliardë euro dëme ekonomike e sociale. Një tragjedi që tronditi ndërgjegjen e publikut, por që, për sistemin e drejtësisë, duket se është kthyer në një farsë proceduriale.
Gjykata e Posaçme për korrupsion dhe krim të organizuar ende nuk ka dhënë asnjë deklaratë publike përse procesi nuk mbyllet, megjithëse për akuzën e “Shpërdorimit të detyrës” ligji parashikon përfundimin e gjykimit brenda 4 muajve.
Pas 30 muajsh drejtësia e re duket më e plakur se e vjetra ndërkohë viktimat e Gërtecit nuk po gjejnë ende paqe. Viktimat rrinë zgjuar nga plagët, Fatmir Mediu fle i qetë…
Nga Pamfleti

Një ngjarje makabre ka tronditur qytetin e Pogradecit, ku një 52-vjeçare u ekzekutua brutalisht nga i dashuri i saj 31-vjeçar, Ilirian Selmani. Viktima, Kozeta Teço, u qëllua për vdekje me një thikë të vjetër buke, me mbi 50 goditje në trup.

Autori i krimit, pasi u arrestua nga policia, pranoi krimin dhe tregoi detaje rrëqethëse rreth aktit të rëndë. Sipas tij, vrasja erdhi pas një konflikti mes çiftit, por ai nuk shpjegoi dot se çfarë e çoi drejt një dhune kaq të tmerrshme.

Pas kryerjes së vrasjes, Selmani ka tentuar të fshijë gjurmët e krimit duke pastruar gjakun në banesë dhe më pas i ka vënë flakën apartamentit për të humbur çdo provë. Por përpjekja e tij për të fshehur gjurmët rezultoi e pasuksesshme.

Kamerat e sigurisë pranë banesës së viktimës, si dhe provat e gjetura në vendngjarje, ishin vendimtare për identifikimin dhe arrestimin e autorit. Policia e Pogradecit konfirmoi se hetimet po vijojnë për të zbuluar motivin e saktë të krimit.

Ngjarja ka shkaktuar tronditje të thellë në komunitetin lokal, ndërsa familjarët dhe të afërmit e viktimës kanë kërkuar drejtësi maksimale për autorin e vrasjes.

Të gjithë punonjëset e zyrës së Ajola Xoxes kanë tradhtuar këtë të fundit, kur janë marrë në pyetje në Prokurorinë e Posaçme, duke treguar se veprimet që kanë kryer përmes faturave, kanë qenë të shtyra dhe ndikuara nga Ajola Xoxa.

Thëniet e punonjëseve që dikur shërbenin pranë zyrave të Ajola Xoxës, si Ines Dani, Adela Kondakçiu dhe Greta Domi, kanë kryqëzuar gruan e kryebashkiakut të Tiranës, Erion Veliaj, duke e nxjerrë atë në një rrjet OJF-të, që kishin si synim kapjen e projekteve përmes fondeve publike.

Ajola Xoxa, përmes lidhjeve të saj me kryebashkiakun e Fierit Armando Subashi, arrin të fitojë një tender në bashkinë e Fierit me vlerë prej 24 mijë e 650 euro.

Kjo sasi parashw do jepej nga programi “IPA”, i bashkimit Ndërkufitar Itali-Shqipëri, Mali i Zi 2014-2020.

Projekti u fitua me letrat e Ines Danit, e cila ishte një punonjëse e zyrës së Ajola Xoxws dhe kishte hapur nipt si “Person Fizik”.