Një ngjarje tragjike ka ndodhur mëngjesin e së premtes në Sofie, ku një 21-vjeçar, i cili kishte marrë patentën vetëm dy javë më parë, shkaktoi një aksident të rëndë me pasojë vdekje dhe plagosje të shumta.
Momente tmerri/ Audi me 170 km/h shkatërron gjithçka përpara, përplaset me autobus të mbushur me pasagjerë (VIDEO)
I riu po drejtonte një Audi me shpejtësi të frikshme prej rreth 170 km/h brenda qytetit, kur humbi kontrollin e mjetit dhe u përplas drejtpërdrejt me një autobus urban. Përplasja ishte aq e fortë, saqë automjeti u shkatërrua pothuajse tërësisht.
Si pasojë e goditjes së fuqishme, humbi jetën një pasagjer sirian që ndodhej brenda autobusit. Policia bëri me dije se viktima u gjet pa shenja jete në vendngjarje, ndërsa dhjetëra pasagjerë të tjerë përjetuan momente paniku.
Shoferi i autobusit mbeti i plagosur rëndë dhe ndodhet në gjendje kritike për jetën. Po ashtu, katër pasagjerë që udhëtonin në automjetin tip Audi pësuan dëmtime serioze dhe u transportuan me urgjencë në spital.
Sipas autoriteteve bullgare, shpejtësia ekstreme dhe mungesa e përvojës së shoferit të ri ishin faktorët kryesorë të kësaj tragjedie. Ngjarja ka ngjallur reagime të forta në opinionin publik, duke rikthyer debatin mbi rregullat e patentimit dhe shkeljen e rregullave të qarkullimit nga të rinjtë.