Kryetari i Bashkisë së Tiranës, Erion Veliaj, ka reaguar publikisht nga paraburgimi përmes një postimi të gjatë në Facebook. Ai e cilëson periudhën 6-mujore në qeli si një “persekutim politik dhe personal”, ndërsa akuzon prokurorinë për shkelje të rënda të të drejtave të njeriut dhe për një hetim të bazuar mbi “thashetheme dhe letra anonime”.
Erion Veliaj përpiqet të prekë publikun: Flet për djalin, sëmundjen por asnjë fjalë konkrete për mega vjedhjet që akuzohet
Veliaj thotë se është njoftuar për akuzat vetëm pasi agjentët e BKH-së e vizituan në qeli, ndërkohë që mediat ishin informuar më herët. Sipas tij, kjo është një shkelje flagrante e sekretit hetimor. Ai e përshkruan dosjen si të dobët, të ndërtuar mbi fletë-rrufe dhe supozime, duke shtuar se akuzat e reja për “agjitacion e propagandë” janë një përpjekje për ta rënduar artificialisht çështjen.
“Vetting personal” dhe hetime deri te familja
Në reagimin e tij, Veliaj thekson se hetimet nuk kanë gjetur asnjë shkelje ligjore në veprimtarinë e tij si ministër apo kryetar bashkie për projektet kryesore të Tiranës. Ai ironizon faktin se hetimi është shtrirë deri te familjarët, duke e krahasuar këtë me praktikat më të ashpra të ndjekjes penale:
“Kujt bosi të drogës ia kanë bërë këtë? Kujt vrasësi serial ia kanë hetuar gjithë fisin?”