Ish-kryetari i Bashkisë së Tiranës, Erion Veliaj, pritet të jetë fizikisht i pranishëm në seancën e 31 tetorit në Gjykatën Kushtetuese, ku do të shqyrtohet kërkesa e tij për shfuqizimin e vendimit për shkarkim nga detyra dhe për pezullimin e zgjedhjeve të reja në kryeqytet. Lajmi është bërë i ditur nga moderatori dhe analisti Endri Xhafo, i cili tha gjatë emisionit të tij se informacioni i është konfirmuar nga një prej avokatëve që përfaqësojnë Veliajn në këtë proces.
E fundit! Erion Veliaj del nga b*rgu për herë të parë?! Ja çfarë pritet të ndodhë
“Sot kam komunikuar me një nga avokatët e zotit Veliaj, sepse ai ka një grup avokatësh që e ndihmojnë në këtë çështje. Më tha se Veliaj do të jetë i pranishëm në seancën e datës 31 tetor,” u shpreh Xhafo. Ai sqaroi se prania e ish-kryebashkiakut është pjesë e një procedure të rregullt ligjore dhe se Gjykata Kushtetueseështë e detyruar të garantojë pjesëmarrjen e tij në sallë, duke bashkëpunuar me institucionet përgjegjëse për transportin dhe sigurinë. “Është detyrim i Gjykatës Kushtetuese. Atë që ai e kërkoi në Këshillin Bashkiak dhe nuk ia dhanë, tani realizohet në mënyrë shumë praktike. Drejtoria e Burgjeve merr masat për transportin e personit të ndaluar me kërkesë të GJK,” shtoi Xhafo.
Veliaj ndodhet aktualisht nën masë sigurie, pasi ndaj tij po zhvillohen hetime për abuzim me detyrën dhe shkelje të procedurave administrative gjatë mandatit të tij si kryebashkiak. Përmes avokatëve, ai ka paraqitur një padi në Gjykatën Kushtetuese, duke pretenduar se vendimi për shkarkimin e tij është i paligjshëm dhe politik, ndërsa dekreti i Presidentit Bajram Begaj për shpalljen e zgjedhjeve të reja në Tiranë përbën, sipas tij, një cenim të parimit të mandatit të fituar me votë. Seanca e 31 tetorit pritet të jetë vendimtare, pasi do të përcaktojë nëse Veliaj do të rikthehet në detyrë ose nëse procesi i zgjedhjeve të reja do të vijojë sipas dekretit.
Burime pranë mbrojtjes së Veliajt bëjnë me dije se grupi i tij ligjor ka përgatitur një dosje voluminoze me prova dhe argumente juridike, të cilat sipas tyre do të vërtetojnë se procedura e shkarkimit është kryer në shkelje të Kushtetutës dhe ligjit për vetëqeverisjen vendore. Në anën tjetër, përfaqësuesit e qeverisë dhe të Këshillit Bashkiak të Tiranës kanë paralajmëruar se do të dorëzojnë kundërargumente, duke insistuar se shkarkimi ishte plotësisht i ligjshëm dhe i mbështetur në fakte konkrete të abuzimeve administrative.
Përballja e 31 tetorit në Gjykatën Kushtetuese pritet të ketë vëmendje të lartë publike dhe mediatike, pasi është hera e parë që një ish-kryebashkiak i Tiranës do të paraqitet personalisht në këtë nivel gjykimi, ndërkohë që qyteti ndodhet në pritje të vendimit që do të përcaktojë fatin e tij politik dhe institucional.