Instituti i Psikiatrisë Forenzike ka përfunduar ekzaminimin psikiatrik të Naim Murselit, i akuzuar për organizimin e vrasjes së bashkëshortes së tij, Liridona Ademajt.
Del raporti psikiatrik për Naim Murselin, ky është rezultati
Sipas raportit që ka siguruar KOHA më 11 korrik, nuk është konstatuar asnjë çrregullim mendor te i akuzuari.
“Tek i ekzaminuari Naim Murseli nuk është konstatuar ndonjë çrregullim mendor apo sëmundje mendore e karakterit të përkohshëm apo përhershëm”, thuhet në raportin e Institutit.
Në dokumentin e njëjtë sqarohet se Murseli nuk ka shfaqur shenja të abuzimit me substanca psikoaktive apo alkool dhe se nuk është identifikuar asnjë problem i natyrës mendore që ta kishte penguar ta kuptonte rëndësinë e veprës penale.
“Në momentin e kryerjes së veprës për të cilën akuzohet, nuk është identifikuar ndonjë simptomatologji e nivelit patologjik, e cila do të mund të ndikonte në aftësinë e tij mendore për ta kuptuar rëndësinë e veprës si dhe të kontrollojë veprimet e tij. Kjo është bazuar edhe në sjelljen e tij dhe dinamikën para, gjatë dhe pas veprës, për të cilën akuzohet.”