TIRANË– Dëshpërimi të shtyn të bësh gjëra të dëshpëruara! Nëse kjo fjali do t’i përshkruante më së miri një grup personash, do të ishin padyshim banorët e Thethit. Të vendosur përballë rrënimit të investimit të tyre, për ditë me radhë kanë pritur “delegacione” me shpresën se dikush do t’i ndihmonte të përballeshin me shtetin. Pritën një grup banorësh nga Mirdita, që i shkuan “për ndihmë” pasi i ishin shembur të gjithë bujtinat, pritën dhe Pëllumb Pilinçin me kompani. Nuk është e pazakontë që miku të pritet si Zot kudo që shkel, por në rastin e fundit, ishte në kufinjtë e abuzueses. Për të sqaruar më shumë dhe për të dhënë kontekst, ZËRI ka përgatitur një profil të Pilinçit dhe të tijëve, që për ata që e kanë përjetuar ose studiuar më vonë të ngjan shumë me Suden dhe Vehbi Alimuça.
Për të gjithë ata që nuk e njohin dhe tashmë do ta njohin, Pëllumb Gani Pilinçi është themelues dhe kryetar i Partisë Shpresa Demokrate, e paraqitur si parti me orientim “demokrat të djathtë” dhe lidhje shqiptaro-amerikane. Ai ka lindur më 16 prill 1948 dhe ka kaluar fëmijërinë në kushte të vështira në Shqipëri komunist. Më pas, ka emigruar në SHBA ku ka ndjekur studimet dhe karrierën arsimore/akademike.
Sipas asaj që thotë vetë, se prova nuk ka paraqitur kurrë, është takuar me figura të njohura amerikane, përfshirë Presidentin dhe zëvendës presidentin e SHBA-së (George H.ë. Bush), si pjesë e një angazhimi me çështjet e Ballkanit dhe Evropës. Me “eksperiencën” premton se do t’i futut edhe ai politikës për të krijuar një qeverie teknike intelektuale në Shqipëri, madje ka gati edhe “ministrat hije”.
Ministrat hije (ose “ministri hije”) është një term politik që vjen nga modeli britanik i opozitës parlamentare, dhe nënkupton: Zyrtarë të opozitës që marrin përsipër rolin për të monitoruar dhe sfiduar ministrat aktualë të qeverisë, duke qenë të gatshëm për t’i zëvendësuar ata nëse opozita fiton pushtetin. Por në këtë pikë do të kthehemi në një moment të dytë.
Ndër vite ai hyn dhe del pa filtër nga ekranet televizive duke bërë deklarata dhe premtime. Një nga deklaratat e tij më të bujshme përfshin edhe kryedemokratin Sali Berisha, për të cilin Pilinçi thotë se e ka bërë ai president. Mirë në Shqipëri, por pretendonte se edhe në Amerikë kishte lidhje me njerëz të rëndësishëm, një prej tyre edhe ish-sekretari i Shtetit, që “haxhonte” kohën e tij për ta telefonuar çdo një orë. Pra; një nga personat më të rëndësishëm në botë, që këshillon vetë (asokohe) presidentin e Shteteve të Bashkuara të Amerikës, Joe Biden dhe që ka mundësi që të konsultohet me ekspertët më të mirë që ka njohur bota dhe njerëzimi…flet dhe merr mendim nga Pilinçi. Kjo mund të jetë një ëndërr e tij, por që kurrë nuk është bërë realitet.
“Kam ardhur me mision nga Amerika për të ndërruar qeverinë për të vërë qeveri të re. Për të larguar Edi Ramën. Misioni jonë është për një qeveri teknike. Unë kam të njëjtin program si kushtetuta amerikane, këtu do të bëhet Amerika. Jam njeriu kryesor për 49 vite në Amerikë, jam plagosur 3 herë për çështje kombëtare. Kam bërë kryeministër Berishën, kryeministrin që ka këtë vendin këtu. Sekretari që është sot, Blinken, bile e di ku ndodhet dhe më bënë telefon çdo një orë. Kemi sjellë ushtarë këtu, po prapë ai është i ulët. Kemi ardhur ta shpëtojmë nga injorantët, nga Edi Rama, si PD dhe PS janë motra. Kur dërgova letër unë këtu Grenell u largua direkt për në Serbi,”-thoshte dikur Pilinçi.
Edhe tani, me shumë gjasa për të bërë pushimet e verës, Pilinçi është kthyer sërish në Shqipëri. Bëri një “xhiro” në Theth ku promovoi idenë e një Shqipërie demokratike, por me vlera euroatlantike. Pjesë e vizionit të tij është “Amerika e Vogël” në zemër të Evropës – ide që përsërit në fjalimet e tij publike. Dhe po! Ka marrë kohën të ndajë vizionin e tij.
Në korrik 2024, Pilinçi dhe Partia Shpresa Demokrate propozuan krijimin e një qeverie teknike me 13 sekretarë (të cilët ai i konsideron si “ministra” sipas modelit amerikan me senatorë) Sipas pilotit politik të partisë, sistemi duhet të përbëhet nga 80 deputetë dhe 41 senatorë, me një qeveri presidenciale ku çdo përfaqësues zgjidhet direkt nga qytetari
Deklaratat dramatike & aksioni i ashpër kundër klasës politike
Pilinçi ka deklaruar se, në ditën që instalohet “qeveria teknike”, Edi Rama do të arrestohet dhe Sali Berisha do të përfundojë në burg. Ka gjetur dhe vendin se ku do i “burgosë”. Të gjithë ABshkë. Në mars 2025 në një intervistë televizive në kanal “Shpresa TV”, ai tha se kampet e emigrantëve në Gjadër dhe Shëngjin do të rikthehen për paraburgosjen e politikanëve të korruptuar. E teksa ishte në Theth, ia “lëshoi” një kërcënim kryeministri Edi Rama.
Edi Rama të kam thënë përpara dy ditëve, do të të tërheq zvarrë deri te Skëndërbeu. Ne do të bëjmë qeverinë. Do të habiteni sesi do ta bëjmë ne këtë vend. Do të bëhet qeveria këtë muaj ose mesi i muajit tjetër,”- ka thënë ndër të tjera Pëllumb Pilinçi.
E bëri këtë deklaratë edhe pse mund t’i rëndojë akuza për “përndjekje”. Sipas Kodit Penal shqiptar, kërcënimi ose ngacmimi i personit me anën e veprimeve të përsëritura, me qëllimin për t’i shkaktuar një gjendje të vazhdueshme dhe të rëndë ankthi apo frike për sigurinë vetjake, dënohet me burgim nga gjashtë muaj gjer në katër vjet. Për shumë më pak u dënua me 1 vit burg deputeti Ervin Salianji, por duket se në këtë rast, Rama nuk ka gjasa të merret. Edhe pse Pilinçi i ka akuzuar liderët e kryesore të partive PD dhe PS si bashkëpunëtorë të interesave të huaja serbe‑rusë dhe si pjestarë të një klase që ka vjedhur pronat e shqiptarëve.
Ndaj edhe herë pas herë, nga makina e tij me flamur amerikan dhe shqiptar, Pilinçi fton shqiptarët, brenda dhe jashtë vendit, të bashkohen për ndërtimin e një shteti pa korrupsion. Në thelb, nuk është se nuk ka të drejtë, por vetë personazhi “Pilinçi” nuk është i duhuri! Edhe pse me shumë mundim ka marrë hapa konkretë dhe ka hapur një seli në Sauk, nga ku inkurajon shqiptarët të bëhen pjesë e partisë së tij për të përmbushur “amanetin e të parëve”.
Tani rikthehemi tek tek ministri në hije.
Vizita në Theth e profesorit shqiptaro-amerikan, Pëllumb Pilinçi, ka qenë një ndër lajmet më të komentuara përgjatë së mërkurës. I blinduar deri në “dhëmb”, me bodygardë (po, po, me truproja) dhe automjet luksoz, Pilinçi takoi banorët e fshatit turistik të Thethit bashkë me një person shumë të rëndësishëm për të. Biznesmenin Rako Paja, i cili mesa duket dëshiron që t’i “rrëmbejë” postin ministres së Infrastrukturës dhe Energjisë, Belinda Ballukut. Prezantimin ia bëri vetë kreu i partisë në Youtube.
“Përshëndetje miq të dashur të televizionit Shpresa. Sot kam nderin të kem në studio ministrin e Energjitikës dhe Infrastrukturës zotin Rako Paja. Përshëndetje zoti Paja,”- i thotë moderatorja, ndërkohë që biznesmeni ia kthen përshëndetjen, duke konfirmuar kështu edhe “postin” e tij. Madje i ka gjetur edhe zv.ministren, një zonjë që u prezantua si Lindita Tela.
Belinda Balluku dhe “rivali” i saj
Teksa aspiron politikën, Rako Paja, biznesmeni nga Skrapari, ka arritur që të dominojë tregun e fotovoltaikëve në Shqipëri, por dhe jashtë vendit, deri në Qipro. Ai rezulton që të jetë aksioner në të paktën 9 kompani të cilat merren kryesisht me ndërtimin e centraleve prodhuese për prodhimin e energjisë së rinovueshme fotovoltaike. Madje, 3 vite më parë është takuar edhe me “armiken” e tij më të re, vetë ministren e Infrastrukturës dhe Energjisë, Belinda Balluku inspektoi nga afër një nga investimet në Dibër, sa i përket prodhimit të energjisë nga dielli.
Po atëherë Balluku nuk e dinte që po takonte pasuesin e saj potencial, që as vetë nuk e beson që është i tillë.
Megjithatë ai e ka nisur një mision, si edhe shumë të tjerë në politikë. Të shohim sesa do të zgjasin…Ndoshta deri në vjeshtë kur të kenë mbaruar pushimet dhe Pilinçi të rikthehet në Amerikë më “green-card” e tij. Në Theth nuk shkon dot më se në dimër bllokohet rruga. Çfarë Xhaferri apo jo? Nuk e njihni Xhaferrin? Epo historia që nuk njihet ka shumë gjasa të përsëritet.
