Category: ShowBizz

Gjykata e Lartë ka hedhur poshtë rekursin e ish-gjyqtares së Elbasanit, Pajtime Fetahu, e cila kërkonte lirimin nga paraburgimi me pretendimin se ndodhej në gjendje të rënduar shëndetësore. Më herët, edhe Apeli i GJKKO-së kishte refuzuar kërkesën e saj, duke lënë në fuqi masën e sigurisë “arrest në burg”.

Fetahu akuzohet për përfshirje në organizatën kriminale të drejtuar nga Suel Çela, një prej emrave më të përfolur në botën e krimit në Elbasan. Sipas dosjes së SPAK, ish-gjyqtarja është pjesë e një rrjeti që përfshin zyrtarë të drejtësisë, punonjës policie dhe përfaqësues të medias, të cilët dyshohet se janë korruptuar për të mbrojtur aktivitetin kriminal të grupit.

Në fund të vitit 2024, SPAK goditi këtë organizatë duke lëshuar 21 masa sigurimi për persona të përfshirë në trafikun ndërkombëtar të kokainës nga Amerika Latine drejt vendeve të Bashkimit Europian. Hetimet, të zhvilluara në bashkëpunim me autoritetet belge, franceze dhe ekuadoriane, zbuluan se paratë nga trafiku përdoreshin për financimin e aktiviteteve kriminale, përfshirë porositjen e vrasjeve në Elbasan dhe pastrimin e parave në biznese të ligjshme në Shqipëri.

SPAK ka deklaruar se organizata kishte ngritur një strukturë të mirëorganizuar për të eliminuar kundërshtarët dhe për të siguruar mbrojtje për veten, duke blerë heshtjen apo bashkëpunimin e funksionarëve të ndryshëm në institucionet shtetërore.

Procesi i rinumërimit në Qarkun e Tiranës ka zbuluar parregullsi shqetësuese në ndarjen e votave, ku Partia Demokratike dhe disa kandidatë të saj rezultojnë të kenë përfituar vota që u takonin formacioneve të tjera politike. Nga 1085 kuti të hapura deri në orën 17:00 të ditës së djeshme, rezulton se PD ka marrë në mënyrë të pajustifikuar rreth 579 vota, në dëm të partive të vogla.

Ndër përfituesit e kësaj situate përmenden edhe kandidatët Jorida Tabaku dhe Ilir Alimehmeti, të cilët rezultojnë me qindra vota që nuk janë arkëtuar realisht prej tyre. Për më tepër, edhe Ilir Meta, aktualisht në paraburgim, ka rezultuar me 59 vota të pamerituara, duke ngritur dyshime për një skemë të gjerë deformimi të vullnetit elektoral.

Të dhënat e rinumërimit tregojnë një tendencë të qartë të transferimit të votave nga koalicione të vogla si “Shqipëria Bëhet”, “Lëvizja Bashkë” dhe Koalicioni Euro-Atlantik i Lulzim Bashës, në favor të partive më të mëdha. Kjo situatë ka ngjallur indinjatë dhe shqetësim mbi besueshmërinë e procesit zgjedhor, duke ngritur nevojën për hetime të plota dhe ndëshkime ligjore për çdo rast manipulimi të qëllimshëm.

Udhëheqësi suprem i Iranit, Ajatollah Ali Khamenei, deklaroi publikisht se sulmet ajrore amerikane ndaj centraleve bërthamore në Fordo, Natanz dhe Isfahan nuk patën ndikim real dhe nuk arritën asgjë të rëndësishme. Ai i quajti ato një “dështim strategjik” dhe paralajmëroi për sulme të reja ndaj bazave amerikane në rajon nëse Irani goditet sërish.

Ndërkohë, Shtetet e Bashkuara, përmes Sekretarit të Mbrojtjes Pete Hegseth dhe presidentit Donald Trump, pretendojnë se sulmet kanë ngadalësuar ndjeshëm programin bërthamor iranian dhe se objektet janë “shkatërruar plotësisht”.

Khamenei përmendi edhe një sulm iranian ndaj një baze amerikane në Katar, të cilin e përshkroi si një paralajmërim të fuqishëm, edhe pse nuk pati viktima dhe SHBA ishte njoftuar paraprakisht.

Në një hap të fortë politik, parlamenti iranian ka miratuar një ligj për pezullimin e bashkëpunimit me IAEA-n, duke ndaluar inspektimet ndërkombëtare në objektet bërthamore – një veprim që vjen menjëherë pas një deklarate të IAEA-s që akuzon Iranin për shkelje të marrëveshjeve bërthamore për herë të parë në 20 vjet.

Gjykata e Lartë ka vendosur të rrëzojë rekursin e depozituar nga Ajola Xoxa, bashkëshortja e ish-kryetarit të Bashkisë së Tiranës, dhe nëna e saj, Valbona Xoxa, në lidhje me sekuestrimin e një pasurie në zonën e Qerretit.

Në rekurs, ato kundërshtonin vendimin e mëparshëm të Gjykatës së Apelit të Posaçëm, që la në fuqi sekuestron e vendosur nga SPAK mbi një banesë të dyshuar si e pajustifikuar me burime të ligjshme.

Së bashku me to, rekurs kanë depozituar edhe dy shoqëri, të cilat gjithashtu kërkuan heqjen e sekuestros, por kërkesat u refuzuan nga Gjykata e Lartë.

Tirana është tronditur sërish nga lëkundje sizmike mengjesin e sotem. Sipas të dhënave paraprake, janë regjistruar dy tërmete me magnitudë 4.1 dhe 4.0 ballë, brenda një intervali të shkurtër kohor.

Banorët e kryeqytetit kanë raportuar ndjesi të forta tërmeti, të cilat kanë shkaktuar panik, megjithëse deri më tani nuk raportohet për dëme materiale apo të lënduar.

Gazetarja Klodiana Lala ka zbuluar detaje nga seanca gjyqësore ndaj Ilir Metës, duke theksuar se ajo është shoqëruar me debate të forta dhe tension mes palëve përreth një orë.

E ftuar në një emision televiziv, Lala tha se pika kryesore e debatit ishte një kartë krediti në emër të Adrian Shatkut, e cila sipas prokurorit dyshohet të jetë përdorur edhe nga Ilir Meta dhe bashkëshortja e tij, Monika Kryemadhi.

Sipas gazetares, Meta ka mohuar çdo përfshirje, duke deklaruar se nuk ka pasur asnjëherë këtë kartë në përdorim dhe se nuk mban përgjegjësi për veprimet e bashkëshortes së tij.

Për më tepër, Meta ka shtuar se nuk ka firmosur në asnjë prej kontratave të lobimit, për të cilat po hetohet.

“Pati një përplasje të ashpër me tone juridike mes prokurorit dhe Metës, që zgjati rreth një orë”, u shpreh Lala.

Në fund të seancës, gjykata vendosi të lërë në fuqi vendimin ekzistues, pa miratuar kërkesat e mbrojtjes.

Një ngjarje e rëndë është regjistruar pak ditë më parë në qytetin Centola, në jug të Italisë, ku një 25-vjeçar shqiptar, Rivaldo Rusi, humbi jetën pasi u qëllua me armë zjarri nga një shtetas italian.

Sipas mediave vendase, ngjarja ndodhi mbrëmjen e së dielës, kur i riu shqiptar, së bashku me një bashkëpunëtor, dyshohet se u futën në banesën e një 60-vjeçari italian, Aurelio Valiante, me qëllim grabitjen e pronës së tij.

Në momentin që vuri re praninë e tyre, Valiante mori armën e gjahut dhe qëlloi në drejtim të të rinjve. Si pasojë e të shtënave, Rusi mbeti i vdekur në vend, ndërsa personi tjetër ndodhet në gjendje kritike në një spital në Napoli.

Pas incidentit, policia italiane shoqëroi autorin e dyshuar të të shtënave, i cili deklaroi para karabinierëve se kishte vepruar në vetëmbrojtje, pasi persona të panjohur kishin hyrë me forcë në vilën e tij.

Autoritetet kanë nisur hetimet për të përcaktuar nëse përdorimi i armës nga ana e biznesmenit italian ka qenë proporcional dhe brenda kufijve të vetëmbrojtjes së justifikuar sipas ligjit italian.

Një konflikt i çastit për motive të dobëta ka përfunduar me gjakderdhje në Dojan të Tropojës.

Burime zyrtare konfirmojnë se rreth orëve të para të mëngjesit, 23-vjeçari Artur Buçpapaj është paraqitur në spital me plagë të marra nga goditje me mjet prerës. Mjekët kanë bërë me dije se i riu ndodhet jashtë rrezikut për jetën, por ka marrë dëmtime serioze.

Sipas Policisë, dyshohet se pas plagosjes fshihet Orgen Lataj, vetëm 18 vjeç, banues në Bajram Curri. Ngjarja dyshohet të ketë ndodhur pas një sherri banal që degjeneroi në dhunë fizike me thikë.

Autori i dyshuar është shpallur në kërkim policor, ndërsa grupi hetimor nën drejtimin e Prokurorisë së Kukësit po punon për zbardhjen e plotë të rrethanave dhe kapjen e të dyshuarit.

Në Gjykatën e Posaçme Kundër Korrupsionit dhe Krimit të Organizuar (GJKKO) është zhvilluar sot seanca gjyqësore ndaj Leonard Dukës dhe të pandehurve të tjerë për vrasjen e ish-policit Santiago Malko, një figurë e afërt me Ervis Martinajn, i njohur si “mbreti i lojërave të fatit”.

Të pandehur në këtë çështje janë Leonard Duka, Erlis Duka, Fatmir Hyseni, Aleksandër Maxhaku dhe Oltian Loga.

Mosprania e dëshmitarëve

Babai i Leonard Dukës, Muhamet Duka, nuk është paraqitur në seancë, për shkak të gjendjes së tij shëndetësore. Avokatja e tij ka dorëzuar raport mjekësor në gjykatë. Gjykata urdhëroi përsëritjen e fletëthirrjes për dëshminë e tij në një seancë të ardhshme.

Komunikimet përmes SKY ECC – Mohime nga Leonard Duka

Në seancë u mor në pyetje Leonard Duka lidhur me komunikimet përmes aplikacionit të koduar SKY ECC, të përdorur nga shumë grupe kriminale për të shmangur përgjimet.

Avokatja: A keni pasur ndonjëherë llogari SKY ECC? Duka: Jo.

Avokatja: A e njihni kodin e përdorur në komunikime?

Duka: S’e kam idenë.

Avokatja: Keni pasur kontakte me persona që kanë pasur SKY?

Duka: Jo, asnjë kontakt.

Prokurori Behar Dibra: Keni komunikuar me Ervis Martinajn?

Duka: Po, e kam takuar. Por s’kam pasur komunikime të tjera.

SPAK njoftoi se ka sjellë prova të reja që implikojnë Leonard Dukën në komunikime përmes SKY ECC me Ervis Martinajn, duke shtuar peshën e akuzave ndaj tij.

Seanca u tensionua kur nëna e Santiago Malkos shpërtheu në lot dhe në akuza ndaj të pandehurve:

“S’ta fal gjakun e djalit kurrë, do ta vras! Më fute djalin në dhe!”

Doha nën zjarr! Forcat e armatosura të Katarit kanë reaguar me shpejtësi rrufe pas një sulmi tronditës me raketa balistike nga Irani ndaj bazës ushtarake amerikane Al Udeid – një nga qendrat më të mëdha të ushtrisë amerikane në Lindjen e Mesme.

Në një deklaratë të fortë, autoritetet e Katarit thanë se sistemet e mbrojtjes ajrore kanë kapur dhe asgjësuar raketat iraniane në ajër, duke shmangur një katastrofë të mundshme.

“Territori i Katarit është i sigurt. Nuk ka viktima, falë ndërhyrjes së menjëhershme të mbrojtjes sonë ajrore”, njoftoi Ministria e Mbrojtjes, duke shtuar se vendi rezervon të drejtën për t’u përgjigjur në përputhje me të drejtën ndërkombëtare.

Ndërkohë, hapësira ajrore e Katarit është mbyllur, dhe mbi 10,000 trupa amerikane ndodhen në gatishmëri të lartë. Irani pranoi sulmin, duke e quajtur atë një “hakmarrje të drejtpërdrejtë” pas goditjeve amerikane në objektet bërthamore të Teheranit në fundjavë.

Tensionet në rajon janë në kulm, ndërsa vendet fqinje si Emiratet e Bashkuara dhe Bahreini po ndjekin nga afër zhvillimet dhe po përgatiten për çdo skenar.