us.shqiperia-sot.com

Avni Rustem, të lumtë dora!”/ Mijëra shqiptarë mbështesin autorin e vrasjes së gjyqtarit Kalaja – çfarë po ndodh me ne?

Written by

Editorial

in

Vrasja e gjyqtarit Astrit Kalaja brenda sallës së gjyqit në Gjykatën e Apelit, ka tronditur Shqipërinë dhe gjithë opinionin publik. Për herë të parë në historinë e drejtësisë shqiptare, një gjyqtar ekzekutohet në detyrë, në vendin ku jepet drejtësi — një ngjarje që ka tronditur thellë themelet e shtetit ligjor dhe besimin e qytetarëve tek institucionet.

Megjithatë, ajo që ka habitur të gjithë është reagimi i rrjetit. Në vend që të dënojnë autorin e krimit, shumë qytetarë në rrjetet sociale janë vënë në anën e tij, duke e quajtur “njeri që vuri drejtësi me duart e veta”. Komentet janë të shumta, të forta dhe shpesh tronditëse.

Ky duhet të deklarohet i pafajshëm, si Avni Rustemi në Paris, e vrava në emër të popullit”, shkruan një komentues.

Një tjetër thotë: “Zoti gjykatës, në emër të popullit, je i pushkatuar! Rroftë Shqipëria, të bekoftë Zoti mor djalë!”

Ndërsa shumë të tjerë shprehen se drejtësia shqiptare i ka sjellë njerëzit në “maje të hundës” dhe se kjo ishte “shpërthimi i një padrejtësie të akumuluar prej vitesh”.

Në komentet nën videot e xhaxhait të autorit, Gjon Shkambi – i cili vetëm një vit më parë kërcënonte publikisht se “do t’i hidhte të gjithë në erë” për pronën në konflikt – qytetarët madje i ofrohen ta ndihmojnë financiarisht:

“Bravo i qoftë, hap një numër llogarie dhe ta ndihmojmë të gjithë me sa kemi mundësi!”, shkruan një përdorues në rrjet.

Sociologët dhe analistët e kanë cilësuar këtë si një fenomen alarmant social. Sipas tyre, mbështetja që shumë njerëz i japin autorëve të dhunës, tregon humbjen totale të besimit në sistemin e drejtësisë. “Kur njerëzit fillojnë të shohin vrasësin si shpëtimtar, atëherë kemi arritur pikën më të rrezikshme të shoqërisë,” shprehet një ekspert.

Kujtojmë se gjyqtari Astrit Kalaja u vra më 6 tetor, gjatë një seance gjyqësore nga Elvis Shkambi, i cili kishte humbur një çështje për pronën në Shkodër. Ai e qëlloi me tre plumba në gjoks, ndërsa nga të shtënat mbetën të plagosur edhe babë e bir, Rakip dhe Ervis Kurtaj. Autori u arrestua menjëherë pas krimit, ndërsa hetimet zbuluan se kishte hyrë i armatosur në sallë përmes një roje sigurie që tashmë është në pranga.

Ndërkohë, vala e komenteve që e paraqesin Shkambin si “hero popullor” tregon më shumë se çdo analizë tjetër — një shoqëri e lodhur, e zhgënjyer dhe pa besim tek drejtësia.

More posts