Author: Editorial

Një ngjarje tronditëse ka ardhur nga Korça, ku një burrë i moshuar është gjetur i pajetë në banesën e tij pas plot 6 muajsh. Askush nuk e kishte vënë re mungesën e tij, ndërsa trupi u gjet vetëm pas gjysmë viti, në kushte të rënda.

Ngjarja ka shkaktuar zemërim dhe reagime të shumta. Avokati i njohur, Zaçe Islami, ka shprehur indinjatën e tij me një mesazh të fortë drejtuar emigrantëve që lënë prindërit vetëm në Shqipëri:

“Turp t’ju vijë! Mos i hëngshi ato lekë! Mos u kthefshi, nëse i lini prindërit vetëm e ikni jashtë!”

Fjalët e tij kanë ndezur debate të forta, duke ngritur një pyetje të dhimbshme: a po harrohen të moshuarit tanë?

Ky rast tragjik është një kambanë alarmi për shoqërinë shqiptare mbi kujdesin dhe vlerësimin ndaj prindërve dhe të moshuarve që shpesh mbeten të vetmuar.

Ky fillim viti shkollor është i veçantë për shumë prindër shqiptarë, por për kryebashkiakun Erion Veliaj ka ardhur edhe me një dhimbje të madhe. Nga paraburgimi, ai ka ndarë emocionet e tij më të thella për faktin se i biri nisi klasën e parë pa praninë e babait.

“Ky vit është i veçantë për mua, teksa edhe im bir shkon në klasën e parë. Më është thyer zemra, pasi nuk mund ta shoqëroj në shkollë në ditën e parë”, shkruan ai me mall dhe trishtim.

Fjalët e tij kanë prekur zemrat e shumë prindërve, sepse dita e parë e shkollës është një moment i paharruar në jetën e çdo familjeje – një kujtim që do të mbetet përgjithmonë. Por për Veliajn, ky kujtim do të mbetet peng, pasi nuk mund ta ndajë këtë gëzim pranë djalit të tij.

Historia e tij na kujton sa e brishtë është jeta dhe sa të çmuara janë momentet me fëmijët tanë.

Valon Lluka, administratori i Shoqërisë “Vlora International Airport – VIA Sh.p.k.”, ka reaguar pas raportimeve për shkarkimin e tij nga detyra.

Dy ditë më parë, vetëm me votat e shoqërisë “Mabco Construcion SA”, Valon Lluka është shkarkuar.

Në një deklaratë të shpërndarë për mediat, Lluka thekson se deri më tani nuk ka marrë asnjë njoftim zyrtar apo akt formal nga organet kompetente, duke e mësuar lajmin vetëm përmes raportimeve mediatike.

Ai shkruan se nuk është i informuar mbi shkaqet apo arsyet ligjore të një vendimi të tillë.

Sipas tashmë ish-administratorit, gjatë gati katër viteve në krye të shoqërisë ai ka vepruar gjithmonë në përputhje me ligjin, kontratën e koncesionit dhe parimet e transparencës, duke shtuar se çdo arsye e mundshme nuk lidhet me performancën apo përkushtimin e tij profesional.

“Në këtë kuptim, arsyet dhe motivet e një vendimi të tillë duhet dhe do të kërkohen nga aksionari që e ka ndërmarrë këtë vendim, e i cili përbën një devijim të rëndë nga parimet e qeverisjes së mirë korporative, normat etike dhe standardet profesionale që duhen respektuar në administrimin e një projekti të kësaj natyre”, shkruan Lluka.

Në Partinë Demokratike Flamur Nokq ka nisur “spastrimet” e radhës.

Deputetët demokratë të cilët nuk arritën të rikonfirmoheshin në parlament, pasi u lanë jashtë listës së mbyllur, janë hequr që sot nga grupet e aplikacionit WhatsApp, për anëtarët e Këshillit Kombëtar dhe të vetë grupit parlamentar.

Fare papritur, një pjesë e mirë e tyre, siç treguan për Report TV, panë se ishin hequr nga lista, pa asnjë njoftim paraprak. Report Tv konstatoi se fshirja e tyre nga grupet e WhatsApp është bërë direkt nga Sekretari i Përgjithshëm Flamur Noka. Në Këshillin Kombëtar, përveç atyre që janë të zgjedhur, bëjnë pjesë automatikisht dhe deputetët e zgjedhur. Ata që humbën në garën e 11 majit, e kishin të qartë se sipas statutit nuk do të mund të ishin më pjesë e forumit të lartë.

Por duke i qëndruar rigorozisht rregullave, ata janë ende deputetë, përsa kohë parlamenti i ri nuk është mbledhur ende. Por kjo lëvizje duket se është e lidhur me mbledhjen e afërt të forumeve, javën e ardhshme. Disa prej atyre që nuk fituan, kanë ngritur zërin, duke folur për nevojën e një analize të humbjes së thellë që PD pësoi, apo nevojën e hapjes së partisë dhe ndryshimeve në drejtimin e saj.

Një qëndrim që bie ndesh me linjën e kryetarit Berisha, që vijon të flasë për një farsë elektorale, e një parlament që nuk do ta njohë, ndonëse do të jetë grupi i opozitës do të jetë i pranishëm në sallë sikundër dhe në komisione.

Hapja e një debati të brendshëm. Qoftë edhe sikur të bëhet fjalë për zëra të izoluar, duket se do të ishte e bezdisshme për PD-në. Dhe Noka ka zgjedhur rrugën më të thjeshtë, por aspak dinjitoze, duke i shmangur nga komunikimi.

Kryeministri Edi Rama, gjatë prezantimit të Operatorit Kombëtar të Ujit, paralajmëroi krijimin e një Task Force në nivel kombëtar, për të mbrojtur qytetarët që paguajnë rregullisht dhe për të garantuar shërbim më të mirë.

Shefi i qeverisë nënvizoi se qytetarët që paguajnë ujin kanë të drejtë të marrin shërbim cilësor, ndërsa abuzuesit që e vjedhin duhet të penalizohen me heqje lirie.

“Ai që paguan ujin ka të gjithë të drejtën të vendosë kujën pse nuk e merr ujin. Ndërsa ai që e vjedh ujin, duhet të penalizohet me heqje lirie, siç ndodhi me ata që vidhnin energji elektrike. Atyre që nuk paguanin energjinë, nuk iu hoq liria, por iu pre energjia. Një gjë është të mos e paguash dhe një gjë ta vjedhësh. Një gjë është të mos e paguash ujin kur të vjen në rubinet dhe je një klient i regjistruar, një gjë është të fusësh tubin te kanali kryesor i furnizimit dhe të vadisësh me ujë të pijshëm bahçen dhe të furnizosh lavazhin. Siç krijuam Task Forcën e energjisë do të krijojmë Task Forcën e ujit në nivel kombëtar dhe do të punojmë shumë fort për të respektuar qytetarët që paguajnë rregullisht ujin dhe që meritojnë një shërbim më të mirë”, tha Rama.