Në një spektakël të organizuar me pompozitet në sheshin Tienanmen të Pekinit, presidenti kinez Xi Jinping drejtoi një paradë ushtarake mbresëlënëse, me praninë e liderëve të Rusisë dhe Koresë së Veriut, Vladimir Putin dhe Kim Jong-un, duke dhënë një mesazh të qartë ndaj Perëndimit dhe veçanërisht ndaj Shteteve të Bashkuara: “Bota duhet të zgjedhë mes paqes dhe luftës”.
Veshur me kostumin klasik në stilin Mao, Xi Jinping priti liderët e ftuar nën Portën e Paqes Qiellore dhe nisi zyrtarisht paradën ushtarake për 80-vjetorin e përfundimit të Luftës së Dytë Botërore në frontin aziatik, një datë që Kina e nderon si “Fitorja në luftën e rezistencës kundër agresionit japonez”.
Shfaqja u ndërtua në tri akte: demonstrimi i fuqisë ushtarake kineze, një fjalim me tone të forta nga Xi Jinping, dhe prania e një grupi liderësh ndërkombëtarë me ndikim destabilizues në rendin global.
Xi paralajmëron SHBA-të për Tajvanin
Në fjalimin e tij, presidenti kinez ngriti një pyetje retorike të ngarkuar me paralajmërime: “Paqe apo luftë? Dialog apo përplasje? Bashkëpunim apo rivalitet shkatërrues?” Ai u bëri thirrje vendeve të botës që të zgjedhin një rend të ri ndërkombëtar “më të drejtë e më të qëndrueshëm”, duke akuzuar Perëndimin për hegjemoni dhe mbizotërim të njëanshëm.
Mesazhi i drejtpërdrejtë ishte për Tajvanin, me Xi që deklaroi se: “Forcat e armatosura do të ofrojnë mbështetje strategjike për rilindjen e madhe të kombit kinez dhe do të kontribuojnë në paqen dhe zhvillimin global.”
Ai shtoi se Ushtria Popullore duhet të shndërrohet në një “forcë të klasit botëror” të aftë të mbrojë me vendosmëri sovranitetin, unitetin dhe integritetin territorial të Kinës.
“Rilindja e madhe e Kinës është e pandalshme”
Xi përfundoi deklaratën e tij me një paralajmërim të qartë: “Rilindja e madhe e Kinës është e pandalshme. Pjesa tjetër e botës duhet të përshtatet për të jetuar në harmoni dhe për të shmangur përsëritjen e tragjedive të historisë.”
Parada që kushtoi 5 miliardë dollarë
Xi, si komandant i përgjithshëm, u ngjit mbi një limuzinë “Bandiera Rossa” dhe përshëndeti trupat, ndërsa topat lëshuan 80 të shtëna nderi, një për çdo vit që ka kaluar nga përfundimi i luftës. Në paradë morën pjesë 10 mijë ushtarë, ndërsa u shfaqën qindra raketa balistike, hipersonike dhe me kapacitete bërthamore, dronë, nëndetëse të transportueshme dhe fluturime taktike të aeroplanëve dhe helikopterëve.
Sipas vlerësimeve të opozitës tajvaneze, organizimi kushtoi rreth 5 miliardë dollarë, përfshirë karburantin, strehimin e personelit, dhe ndalimin e përkohshëm të fabrikave ndotëse për të siguruar një qiell të kthjellët mbi Pekin.
Nga Putin dhe Kim, te Lukashenko e Irani – kush ishte në tribunën e nderit
Në tribunën e liderëve, u ulën përfaqësues nga 26 vende. Nuk kishte asnjë përfaqësues të SHBA-së apo BE-së, një sinjal i qartë i distancës që Perëndimi mban ndaj politikës kineze.
Pranë Xi-t ishin Vladimir Putin – i cilësuar si “miku i përhershëm”, i sapo shpërblyer me marrëveshjen për gazsjellësin “Fuqia e Siberisë 2”, dhe Kim Jong-un, i cili për herë të parë mori pjesë në një ngjarje shumëpalëshe, pas marrëveshjes së ndihmës ushtarake me Rusinë në luftën kundër Ukrainës.
Të pranishëm ishin gjithashtu presidenti iranian Masoud Pezeshkian, lideri i Mianmarit Min Aung Hlaing dhe presidenti i Bjellorusisë Aleksandr Lukashenko, të gjithë aleatë të linjës anti-perëndimore dhe mbështetës të vizionit të Xi për një botë shumëpolare.
Një mesazh i qartë për rendin e ri botëror
Parada e sotme në Pekin nuk ishte vetëm një kujtim historik, por një shfaqje e fuqishme mesazhesh gjeopolitike. Prania e Kim dhe Putin përkrah Xi-t përforcoi idenë e një blloku autoritar që sfidon rendin ndërkombëtar të udhëhequr nga SHBA-të. Mesazhi i përbashkët ishte i qartë: “Nuk ka bullizëm perëndimor që mund të na ndalë.”
