Një ngjarje e rëndë ka tronditur mbrëmjen e së dielës qytetin e Sarandës, ku dy motra të reja, Elvisa dhe Rozina Dhimaku, kanë humbur jetën si pasojë e një aksidenti tragjik në aksin rrugor Sarandë–Delvinë.
Shkatërrim total/ DALIN PAMJET e aksidentit ku dy motrat Dhimaku humbën jetën, makinat ‘copë-copë’
Sipas informacioneve zyrtare, përplasja ka ndodhur rreth orës 20:15 në vendin e quajtur “Pularia”. Një automjet tip Audi, i drejtuar nga 23-vjeçari Kevin Nora, u përplas me një makinë tip Lancia që drejtohej nga Elvisa Dhimaku, 22 vjeçe. Përplasja ballore ishte tepër e fuqishme, duke shkaktuar shkatërrim pothuajse total të të dy automjeteve.
Si pasojë e goditjes fatale, humbën jetën në vend Elvisa Dhimaku dhe e motra e saj 20-vjeçare, Rozina Dhimaku, e cila ishte studente e mjekësisë. Dhimbja për familjen është e paimagjinueshme, pasi dy vajzat u shkëputën nga jeta në kulmin e rinisë së tyre.
Nga aksidenti mbeti e plagosur rëndë edhe 24-vjeçarja Antonela Zhupa, pasagjere në automjetin e motrave. Ajo u transportua menjëherë drejt spitalit dhe ndodhet nën kujdesin e mjekëve, jashtë rrezikut për jetën.
Policia dhe prokuroria kanë nisur hetimet për të zbardhur shkaqet dhe rrethanat e aksidentit, ndërsa pamjet e publikuara nga vendi i ngjarjes tregojnë përmasat e tragjedisë, me automjetet e shkatërruara pothuajse plotësisht.
