Një studim voluminoz ndërkombëtar ka zbuluar se konsumimi i vetëm dy birrave në ditë mund të lidhet me ndryshime të dukshme në strukturën e trurit, duke përshpejtuar plakjen e tij me efekte të ngjashme me një dekadë të tërë.
Dy birra në ditë lidhen me plakjen e parakohshme të trurit, paralajmërojnë shkencëtarët
Hulumtimi, i botuar në revistën prestigjioze Nature Communicationsnë vitin 2022, ka analizuar më shumë se 36 mijë skanime të trurit dhe ka treguar se edhe nivelet e moderuara të alkoolit ndikojnë drejtpërdrejt në reduktimin e volumit të lëndës gri dhe të bardhë,
Sipas shkencëtarëve nga Universiteti i Pensilvanisë dhe institucione të tjera që morën pjesë në studim, njerëzit që konsumonin katër njësi alkooli në ditë (ekuivalenti i rreth dy birrave) kishin ndryshime në tru të krahasueshme me plakjen natyrale prej dhjetë vjetësh. Këto efekte ishin progresive: sa më shumë rritej sasia e alkoolit, aq më i madh ishte dëmtimi. Madje edhe konsumimi më i ulët, si një birrë në ditë, tregonte ndikime të dukshme në krahasim me moskonsumuesit.
Alkooli është i njohur si një neurotoksinë dhe sipas ekspertëve ndikon në tkurrjen e trurit duke dëmtuar si qelizat nervore, ashtu edhe lidhjet që mbajnë funksionet kognitive aktive. Një element shqetësues i përmendur nga studiuesit është se dëmtimi prek jo vetëm lëndën gri, e cila lidhet me përpunimin e informacionit, por edhe lëndën e bardhë, e cila ndihmon në komunikimin midis zonave të ndryshme të trurit. Dobësimi i saj mund të sjellë pasoja serioze për kujtesën, përqendrimin dhe koordinimin motorik.
Efektet negative të konsumit të gjatë të alkoolit nuk kufizohen vetëm në tkurrjen e trurit. Mjekët paralajmërojnë se konsumimi kronik lidhet gjithashtu me mungesën e vitaminës B1 (thiaminë), një substancë thelbësore për funksionimin e trurit. Një mungesë e rëndë e kësaj vitamine çon në sindromën Wernicke-Korsakoff, një sëmundje e rrezikshme që shkakton dëmtime të rënda të kujtesës dhe aftësive njohëse.